అవతార్ 2 - అవతార్ 3 కథలు లీక్
2009లో రిలీజైంది అవతార్. 2.7 బిలియన్ డాలర్ల గ్రాస్ తో ఇప్పటికీ ఈ సినిమా నంబర్ 1 స్థానంలో నిలిచింది. అవతార్ రిలజై ఇప్పటికే 9 ఏళ్లు కాలగర్భంలో కలిసిపోయాయి. దాదాపు పదేళ్ల తర్వాత ఈ సిరీస్లో సీక్వెల్ సినిమాలు రిలీజ్ లకు రెడీ అవుతున్నాయి. 18 డిసెంబర్ 2020లో అవతార్ 2 - 17 డిసెంబర్ 2021న అవతార్ 3 చిత్రాలు రిలీజ్ కి రెడీ అవుతున్నాయని ఇదివరకూ దర్శకదిగ్గజం - ది గ్రేట్ జేమ్స్ కామెరూన్ ప్రకటించారు. అవతార్ సినిమాలో ఒక పండోరా చూపించినందుకే అంత ఎగ్జయిట్ అయ్యారు. ముందుంది ముసళ్ల పండగ! అని అప్పట్లోనే ప్రకటించాడు. అందుకు తగ్గట్టే భారీ కాన్వాసుపై పార్ట్ 2 -3 చిత్రాల్ని పూర్తి చేస్తున్నారు.ఇప్పటికి అవతార్ 2 - అవతార్ 3 సినిమాల చిత్రీకరణ పూర్తయింది. ఇకపై నిర్మాణానంతర పనులు పూర్తి చేసి రిలీజ్ చేయాల్సి ఉంది. అంటే ఇంకో రెండేళ్ల పాటు పూర్తిగా పోస్ట్ ప్రొడక్షన్ వర్క్ కే కేటాయించనున్నారు. ముందుగా షూటింగ్ పూర్తవ్వగానే అవతార్ లోగోని కామెరూన్ బృందం ఆవిష్కరించింది. ఈ లోగోని `పాపిరస్` తరహాలో డిజైన్ చేయడం ఆసక్తి పెంచుతోంది. ఈ డిజైన్ లో జేక్ సుల్లీ రెట్టింపు బలం పెంచుకుని తన డేగ (పాపిరస్)పై ప్రయాణిస్తూ కనిపించాడు.